මහා භද්‍රකාලී මෑණියෝ

භද්‍රකල්පයේ දෙවඟන ” මහා භද්‍රකාලී මෑණියෝ “

” කාලිනෙ ගෝවින්දන්
පාලන්තු ලෝක සාසනං
ඒ තේජානු භාවෙන කාලිදේවි
නමෝ නමං “

හුදී ජනී ජනයාගේ මහත් වන්දනාවට පාත්‍ර වන්නා වූ කාලි මෑණියන් යනු ඉන්දීය සම්භයවයකින් යුතු හින්දු දෙවඟනක් ලෙස සැළකුවත් මේ ශ්‍රී ලංකාද්වීපය තුළ දේව ඇදහීම් අතර ප්‍රමුඛත්වයක් ගන්නා දේවතාවුන් වහන්සේලා අතර කාලි මෑණියන්ට සුවිශේෂී ස්ථානයක් හිමි වේ.

ලෝක විනාශය වළකා ස්වභාදහම රැකගැනීමට ක්‍රියාකල නිසා ජගත් මාතාව ලෙසින් ද කාලි මෑණියන් හඳුන්වනු ලබන අතර කාලි මෑණියන් යනු මේ මහා භද්‍ර කල්පයට අධිපති දෙවඟනයි.

ඊශ්වරයන්ගේ ප්‍රිය භාර්‍යාව වන පාර්වතී දේවියගේ බලගතු අවතාරයක් ලෙසින් කාලි මෑණියන් සළකන අතර සුරයන්ට හා නරයන්ට පීඩා පමුණුවන ලද අසුරයන්ගේ මහා රජ වූ මහා බලගතු දුර්ගා නම් අසුරයා සමඟ සටන් කොට එම අසුර සේනා විනාශ කල බවත් මේ මහා විශ්වයම තම සුළැඟිල්ලේ රඳවා පරතෙර නොමැති වේගයෙන් කරකවා තම අනුහස් බල පෑ බවත් කාලි හත්කට්ටුවකින් හා කට්ටු 21ක් වශයෙන් පෙනී සිටිනා බවත් කියැවේ. එම කාලි හත්කට්ටුව පිළිවෙළින් මහා භද්‍රකාලි , ලේ කාලි , ගිනි කාලි , සොහොන් කාලි , රීරි කාලි , ප්‍රේත කාලි හා හනුමාපත්‍ර කාලි නම් වේ. කාලි මෑණියන් රෞද්‍ර , ප්‍රචණ්ඩ ස්වරූපයෙන් මෙන්ම මෘදු බවින් යුක්‍තව පෙනී සිටින අවස්ථා ද පවතී. එවැනි අවස්ථා වලදී පාර්වතී උමා , සකී ආදී නම් වලින් ද රෞද්‍ර අවස්ථා වලදී කාලි , දුර්ගා , භෛරවී ආදි නම් වලින් ද කාලි මෑණියන් හදුන්වනු ලබයි. කාලි මෑණියන්ගේ මෘදු වූ යහපත් ගති පැවතුම් වලින් සමන්විත වූ ස්වරූපයට හේතුව ලෙස උන් වහන්සේ පත්‍තිනි මෑණියන්ගේ සේවිකාවක්ව සිටීම බවද ජනප්‍රවාද කතා පුවත් වලින් කියැවෙන අතර පත්තිනි මෑණියන් සේම කාලි මෑණියෝ ද ගැබිනි මවුවරුන්ට පිහිට වූ බව ද කියැවේ.

කාලි මෑණියන්ගේ උපත පිළිබඳව බොහෝ ජනප්‍රවාද කතා පවතී. කාලි මෑණියන් හදුන්වන්නේ ස්වභාදහමේ විනාශකාරි බලවේගය ලෙසයි. බිලි පූජා , මස්මාලු , පුලුටු , අඳුන් ලේ , තෙල් වර්ග මිශ්‍ර කෑම හා රීරි ගොටු වලට මහත් ප්‍රියතාවයක් දක්වන කාලි මෑණියන්ගේ දේව ස්වරූපයට වඩා යක්ෂ ස්වරූපය ඉස්මතු වී පෙනෙන පරිදි බොහෝ ස්ථාන වල උන් වහන්සේගේ ප්‍රතිමා ස්ථාපනය කොට ඇත. ඒවා බොහෝ රෞද්‍ර ස්වභාවයක් ගන්නා අතර වම්පස දෑත්වල මිනිස් හිසක් හා පිහියක් ද දකුණුපස දෑත් වලින් ආශිර්වාද කරන අයුරුත් නිරූපණය කෙරෙන අතර එක් පාදයක් ශිව දෙවියන්ගේ සිරුර මත තබා මිනිස් හිස් වලින් සමන්විත වූ මාලයක් පැළද දිව දිගු කරගෙන සිටින අයුරින් ඒවා නිරූපණය කෙරෙයි. තවත් විටෙක එක් අතක දුන්නක් සහිතව රැලි කොණ්ඩය නයි සමකින් හිස මුඳුනට ගැටගසා ඌරු දළක් ගසාගෙන කොටි දත් මාලයක් පැළද ඉණ වටා කොටි සමක් දවටාගෙන සිටින බවක් ද පෙන්වයි.

කාලි මෑණියන්ගේ කතා පුවත පිළිබඳව බොහෝ ජනප්‍රවාද කතා පැවතියත් ශ්‍රී ලාංකික බැතිමතුන් අතර පවතින ප්‍රධානතම පිළිගැනීම වන්නේ කාලි මෑණියන් තවත් පිරිසක් සමඟ ඉන්දියාවේ සිට ගල් නැවකින් මෙරටට පැමිණ ගොඩබැසීමට පත්තිනි මෑණියන්ගෙන් අවසර ඉල්ලූ බවත් එහි දී පත්තිනි මෑණියන් විසින් ආභරණ පැළදීමටත් , පොල් කෙළි , අං කෙළි හා පුද පූජා පිළිගැනීමටත් කාලි මෑණියන්ට අවසර දුන් බවත් ය. මහා භද්‍රකාලි නමින් උතුම් දේවත්වයට පත්වන කාලි මෑණියන් දරු සම්පත් බලාපොරොත්තු වන්නන්ට , අවධානම් රැකියා කරන්නන්ට පිහිටට පැමිණෙන බවත් සොර සතුරු උවදුරු වලට හා අවනඩුවලට දඩුවම් පමුණුවන බවත් එදා සිට අද දක්වාම පැමිණෙන විශ්වාසයයි.

මෙරට තුළ කාලි මෑණියන් ඇඳහීම මහත් සේ ප්‍රචලිතව ඇත්තේ උතුරු මැද නුවර කලාවිය ප්‍රදේශයේය. එසේම කෝනේශ්වරම් , මුන්නේශ්වරම් හා මෝදර ආදි ස්ථාන වල ප්‍රධාන වශයෙන්ම කාලි මෑණියන් වෙනුවෙන් පුදපූජා පවත්වන අතර කඩුදෙවොල සිද්ධ රංකඩු පත්තිනි දේවාලය තුළද කාලි මෑණියන් වෙනුවෙන් පුද පූජා ඉටු කෙරෙයි. කාලි මෑණියන් යනු බොරුව නොඉවසන සත්‍යවාදි දෙවඟනක් වන නිසාම උන් වහන්සේ වෙනුවෙන් නිසි පරිදි පූජා චාරිත්‍ර නිවැරදිව නොතැබීමෙන් අනිටුඵල විපාක ලැබිය හැක. එම නිසා නිවැරදිව පුරාණ පුදසිරිත් චාරිත්‍රප්‍රකාරව කාලි මෑණියන් වෙනුවෙන් පුද පූජා පැවැත්විය යුතුය.

කාලි මෑණියන්ගේ අවතාරයන් අතරින් බිහිසුණුම අවතාර ලෙස භද්‍රකාලි මෑණියන්ගේ ප්‍රධාන යක්ෂ සේනාධිපතිනිය ලෙසින් සැළකෙන අමුසොහොන තම නිවහන කොට වැඩවසනා සොහොන් කාලි අවතාරයත් , දුර්ගා මෑණි අවතාරයත් , පය තබන තබන තැන ගිනිබත් කිරීමේ හැකියාව ඇති වසංගත රෝග පතුරුවන වදුරුකාලි අවතාරයත් ( හනුමාපාත්‍ර කාලි ) සැළකිය හැක.
අවමංගල්‍යය අවස්ථාවලදී මෘත දේහය නිවසින් සොහොනට ගෙන ගිය පසු නිවසේ මෘත දේහය තැන්පත් කර තිබූ ස්ථානයේ ළිප් බැඳ කිරි ඉතිරිවීම සිදුකරන්නේ ද මෙම සොහොන් කාලි මෑණියන් හෙවත් මංගර යක්‍ෂණිය පිදීමට බව කියැවේ.

මේ මහා භද්‍ර කල්පයේ ලොව පහල වූ කකුසඳ, කෝණාගම , කාශ්‍යප හා ගෞතම යන බුදුන්වහන්සේලා වැඩ වසන සමයේ ඉපිද මසා සේ පින්දහම් රැස්කොට එම බුදුන් වහන්සේලා වෙතින් බුදු වීමට විවරණ ලැබූවෙකු ලෙස ද කාලි මෑණියන් පිළිබඳ තොරතුරු ගවේෂනයේ දි හෙලි වේ.

” ධ්‍යාත්වා කාලිං මහා මායං
ත්‍රිනේත්‍ර බහු රූපිණිං
චතුර් භුජං ලෝල ජිව්හං
පූර්ණ චන්ද්‍ර නිභා නමාමි

නිලොත්පල දල ශ්‍යාමං
ශෘතැ සංඝ විදාරි නම්
නර මුණ්ඩ තථා ඛඩ්ග
කමලං වරදං තථා

බ්‍රීභ්‍රාණං රක්ත වස්ත්‍රං
ඝොරදංෂ්ඨා ස්වරූපිණිම්
අට්ඨ දාසං නිරතං
සර්වදාච දිගම්බරම් “

තමන්ට වූ විපතක් කරදරයක් සොරසතුරු උවදුරක් ආදි විපත් වලදී බැතිමතුන් කාලි මෑණියන්ගේ පිහිට අපේක්ෂා කරන අතර රෞද්‍ර ස්වරූපයෙන් යුක්ත වුවද සාධාරණ ලෙස ක්‍රියා කරන වරදට දැඩි දඩුවම් පමුණුවන යහපත් මිනිසුන්ට පිහිටට පැමිණෙන දෙවඟනක් ලෙස කාලි මෑණියන් ප්‍රචලිතය. එසේම කාලි මෑණියන්ගේ දේව උදහසට ලක් වූවන්ට අත්වන ඉරණමත් ඔවුන් අත්විදින දරුණු ප්‍රතිඵලත් ජීවමානව සාක්ෂි දරණ බව නොරහසකි. අයහපතට අකැප වූ යහපතට කැප වූ සාධාරණත්වයේ උතුම් දෙවඟන වූ කාලි මෑණියන් වහන්සේගේ නිබඳ පිහිටාරක්ෂාව ඔබටත් මටත් අප සැමටම උදාවේවා!

තෙරුවන් සරණයි!

සත් පත්තිනි මෑණියන්ගේ පිහිටයි!

✍️ උමේෂ් මේනුක
මාධ්‍ය අංශය,
කඩුදෙවොල සිද්ධ රංකඩු පත්තිනි දේවාලය.
කඩුවෙල